كتير من الناس نفسهم يشاركوا في خدمة ضيوف الرحمن، سواء في تنظيم الحشود، أو إرشاد الزوار، أو مساعدة كبار السن داخل المسجد الحرام والمسجد النبوي. والسؤال اللي بيتكرر دايمًا: أسجل منين؟ وإزاي أعرف المهام المتاحة ومواعيدها؟ الإجابة الرسمية هي تطبيق تطوع الحرمين، اللي تقدمه الهيئة العامة للعناية بشؤون المسجد الحرام والمسجد النبوي.
نزلت التطبيق ولفيت في أقسامه، وفي المقال ده هشرحلك هو معمول لمين، وبيقدم إيه، وإيه اللي لازم تعرفه قبل ما تحاول تسجل.
التطوع لخدمة الحرمين الشريفين حتى الآن مقتصر على المقيمين داخل المملكة فقط، ولم يُفتح إلى الآن لغير المقيمين خارج المملكة.
ما هو تطبيق تطوع الحرمين؟
تطوع الحرمين تطبيق رسمي من الهيئة العامة للعناية بشؤون المسجد الحرام والمسجد النبوي (GPH)، وهو مخصص لإدارة المتطوعين في الحرمين الشريفين. الفكرة إن كل حاجة تخص المتطوع تبقى في مكان واحد: المهام المطلوبة، ومواعيدها، والتعليمات الخاصة بكل مهمة، ومتابعة إنجازها بعد ما تخلص.
التطبيق موجود على جوجل بلاي ضمن فئة الأعمال، وتحميلاته تعدت 10 آلاف، وتقييمه حوالي 4.7 من 5. وده رقم منطقي، لأن التطبيق مش موجه لعامة الناس، لكنه موجه للمتطوعين المسجلين فعلًا.
تجربتي مع التطبيق
جربت التطبيق على Poco X9 بأندرويد 17 وواجهة HyperOS 4. التحميل والفتح كانوا سريعين، والواجهة بسيطة وبالعربي. أول ما تفتحه بيطلب منك تسجيل الدخول بحساب المتطوع، ومن غير الحساب ده مش هتقدر تشوف المهام.
ولأن التطوع حاليًا مقتصر على المقيمين داخل المملكة، الحساب بيتعمل للمتطوعين اللي اتقبلوا من خلال القنوات الرسمية للهيئة. يعني التطبيق نفسه مش بوابة تسجيل للناس من برا، لكنه أداة شغل للمتطوع بعد ما يتقبل.
إزاي بيشتغل التطبيق مع المتطوع؟
- تسجيل الدخول بالحساب المعتمد للمتطوع.
- مراجعة المهام المنظمة مسبقًا ومواعيدها، فتعرف هتشتغل فين وإمتى.
- قراءة التعليمات الخاصة بالمهمة قبل ما تبدأ، عشان كل متطوع يكون فاهم دوره.
- تعبئة النماذج المخصصة لكل نوع مهمة.
- متابعة الإنجاز بعد ما تخلص، والتطبيق بيسجل ده للجهة المنظمة.
ودي شاشات من داخل التطبيق بتوضح شكل التقديم على الفرص التطوعية. لما تفتح أي فرصة، بتلاقي اسمها والجهة المنظمة، والمكان والتاريخ وعدد الساعات، ووصف المهمة وتعليمات التطوع، وتحت زرار “انضم للتطوع” عشان تقدم عليها، أو “أعتذر” لو مش هتقدر:
وفيه كمان قسم نماذج التطوع، وكل نموذج خاص بنوع مهمة، زي الإرشاد والتوجيه وخدمة كبار السن والترجمة، وجنب كل نموذج زرار “إضافة”:
أهم المميزات
- تطبيق رسمي: صادر من الهيئة المسؤولة عن الحرمين، فمفيش وسطاء.
- تنظيم المهام مسبقًا: كل مهمة ليها وقت ومكان واضحين.
- نماذج مخصصة لكل نوع من المهام.
- تعليمات واضحة للمتطوع قبل التنفيذ.
- تنسيق جهود المتطوعين عشان الشغل ميتكررش ولا يتلخبط.
- متابعة الإنجاز بعد كل مهمة.
- خصوصية واضحة: المطور بيقول في المتجر إن التطبيق مش بيجمع بيانات ولا بيشاركها مع أطراف تانية، والبيانات مشفرة أثناء النقل.
العيوب اللي لاحظتها
- مقتصر على المقيمين داخل المملكة، فمش مفيد حاليًا لأي حد برا السعودية.
- مفيش طريقة تسجيل كمتطوع جديد من جوه التطبيق للزوار.
- بعض التقييمات الحديثة اشتكت من مشاكل في تسجيل الدخول واستعادة كلمة المرور.
- آخر تحديث كان تحسينات عامة وإصلاح أخطاء من غير مميزات جديدة واضحة.
نصائح لو أنت مقيم وعايز تتطوع
- تابع الموقع الرسمي للهيئة gph.gov.sa عشان تعرف مواعيد فتح التطوع وشروطه.
- حمّل التطبيق من جوجل بلاي بس، وتأكد إن المطور GPH.
- لو واجهتك مشكلة في الدخول، تواصل مع الدعم على [email protected].
- متدفعش فلوس لأي صفحة بتوعدك بفرصة تطوع، فالتطوع الرسمي من غير مقابل.
أسئلة شائعة
هل أقدر أتطوع في الحرمين من مصر؟
لحد دلوقتي لا، التطوع مقتصر على المقيمين داخل المملكة، ولم يُفتح لغير المقيمين.
هل التطبيق مجاني؟
أيوه، مجاني بالكامل ومن غير إعلانات.
هل ينفع أسجل كمتطوع من التطبيق؟
التطبيق بيستخدمه المتطوعون المعتمدون لإدارة مهامهم، والتسجيل بيكون من خلال القنوات الرسمية للهيئة.
هل بيستهلك البطارية؟
لا، في تجربتي على Poco X9 كان خفيف ومش من التطبيقات اللي بتسحب بطارية.
رأيي النهائي
تطوع الحرمين تطبيق رسمي ومنظم، ومفيد جدًا للمتطوعين المقيمين في السعودية، لأنه بيجمع المهام والتعليمات والمتابعة في مكان واحد. لكن لو أنت برا المملكة، فالتطوع لسه مش متاح ليك، فخلي عينك على إعلانات الهيئة الرسمية لحد ما يتفتح.
